羅馬鬥獸場 Colosseum (維斯帕先競技場 Vespasian Amphitheater)/下 (公元70-80年)

建築奇跡
羅馬鬥獸場(Colosseum)破土動工開始修建既第9年,公元79年,建築物自羅馬城既天際線升起,已經起到第三層接近封頂。但係下令建造鬥獸場既維斯帕先(Vespasian)已經係70歲既老人。佢唔會有眼睇到呢座偉大建築落成既一日。79年,維斯帕先駕崩,跟隨老父征戰多年既太子提圖斯(Titus)繼位,翌年競技場結構封頂,呢座可以容納50,000到80,000人既大競技場正式啟用。提圖斯(Titus)為鬥獸場舉辦左一場隆重既落成慶典,慶典連續100日進行,通常早上進行鬥獸表演,中午進行犬決,下午進行角鬥表演,而觀看表演既貴族同元老通常都會利用中午呢段時間出外用餐。歷史記載,提圖斯(Titus)甚至悉心安排左一場模擬海戰響鬥獸場內進行添!事實上,由於鬥獸場係起響舊尼祿金殿(Domus Aurea)既人工湖上,所以原有連接水道橋既排水系統可以響鬥獸場既舞臺上快速注水同排乾,令到模擬海戰之類精彩表演可以順利進行。


公元80年弗拉維.提圖斯發行的,記念鬥獸場落成的特別版記念幣

另一枚提圖斯所發行鬥獸場落成記念幣,大英博物館(British Museum)館藏

記念鬥獸場落成的銘文,圖中清晰可見的文字是後來加上去的,原來的銘文靠鑲字孔的位置破譯


鬥獸場銘文復完

鬥獸場復完圖(剖面)

另一張剖面圖,觀眾進出既走廊、座位、舞臺、舞臺下錯綜複雜既迴廊、密室同機關清晰可見

觀眾席與社會階級
同現代既表演場地一樣,鬥獸場既座位有分好同唔好架,不過呢鬥獸場既位置唔係睇買飛決定,而基本上係睇你既社會地位決定。最高地位既皇帝(Emperor)有佢獨立既包廂,元老院(Senate)既元老(Senator)就坐響最近表演臺既位置,元老之上係騎士階級(Knight)既座位,再之上分別係富裕既羅馬公民、窮等羅馬公民既位置。呢d座位係用大理石建造,好硬,所以觀眾係supposedly要帶自己既座墊。至於最上面既「山頂」位係提圖斯之後的圖密善(Domitian)加建,大部分係得企位,座位係用木搭成,預留比女人、奴隸等等。除此之外,亦都有特別既分區留比學生團隊、休假軍人、外國人、宗教人士等。有部分座位甚至刻有姓名,相信係留比特定人士用。鬥獸場內既座位係靠大量中空的走廊同迴廊同場館外連接,場館亦都設有76個出入口,每個出入口都有標記數字由I(羅馬數字1)到LXXVI(羅馬數字76)號閘口,指示觀眾到達座位,原理就好似現代既場館分A、B、C區入口一樣。呢個設計確保觀眾能夠迅速進場同疏散。除此之外,亦都有四個特別設計既入口。當中北閘係政府人員既入口,南閘係皇帝專用既入口,東閘係角鬥士進場同戰勝離場既閘口(所以亦都稱為生命之門),西閘係將死去既角鬥士屍體抬離場地的閘口(所做以亦都稱為死亡之門)。


滿座的鬥獸場復完圖

鬥獸場的橫切面

公元200年左右刻成既羅馬城街道圖(Forma Urbis Romae)當中既鬥獸場,大理石刻畫當中可見鬥獸場部分座位,以及AMPHITHEATRVM標籤當中既「ATRVM」五個字母)

鬥獸場座位編排圖:橙色係元老同貴族既座位、藍色騎士階級、綠色中產公民及軍人、紫色窮人、墨綠色係比女人及奴隸既山頂位

鬥獸場內既大理石砌座位

場館內的飲食
響觀看表演既時候,觀眾難免會有口渴既時候,為左解決呢個問題,鬥獸場幾乎每層都有食水供應。從城內高架水道既配水系統,利用加壓既金屬管道將水輸往鬥獸場高層座位,令到場館內幾乎每層都設有飲水機。而同任何場館一樣,響古代,鬥獸場既周邊附近設有好多類似現代快餐店之類既takeaway店,呢d店鋪不設雅座,只供應食物。由於大部分羅馬居民居住既多層式住宅大廈單位不設廚房亦都嚴禁明火,所以出街食野響古羅馬本來就好流行,當中好多食物都近似現代快餐既雛形,例如當中一種拉丁語稱為Isicia Omentata既食物(大麵包切開一半夾入松子仁烤肉餅及醬料),就非常類似今日既漢堡包。

加建與維修
響提圖斯之後,鬥獸場經多次改建同修復,提圖斯既繼任者圖密善皇帝響鬥獸場加上最頂部既木結構山頂位,亦都響表演舞臺既底下加建用作囚禁犯人同野獸既獸欄。舞臺底層有好多機關,可以用滑輪系統等,按照表演需要升起佈景同道具,地板亦都可以突然打開放出野獸同囚犯。響呢個製造戲劇效果既系統當中,羅馬人甚至利用左類似於升降機既技術,不過當時既升降機係用人力和牲畜力開動,可以將需要既物品從舞臺底下升到舞臺上。


公元222年,羅馬皇帝亞歷山大.塞維魯(Alexander Severus)修復被閃電引起既火災破壞既鬥獸場,發行鬥獸場特別記念金幣。呢枚金幣響拍賣會中創下US$ 920,000 (713萬港幣)既破記錄成交價

小結
弗拉維競技場,即鬥獸場既設計體現在古羅馬人精湛既工程技術,當中符合聲學原理既設計,令到數萬既觀眾都能夠聽到舞臺上既聲音,無論係文藝既話劇對白獨白、殘忍既廝殺慘叫聲、野獸既咆哮、角鬥士刀劍相擊的金屬聲,都能夠聽得清清楚楚。直到今日,鬥獸場既基本建築佈局同幾何設計一直沿襲至今,到現代既體育場館設計原理同羅馬鬥獸場並無明顯區別。事實上,響世上好多地方,古希臘同羅馬既劇場至今仍一直被用作藝術表演,例如話劇、演唱會同音樂會既用途,足見羅馬人建築設計既前瞻性。而時至今日,位於羅馬舊城中心既鬥獸場,每年仍舊吸引大約1000萬人次既遊客觀賞呢個古代超級工程既成就。



鬥獸場既平面圖,現代體育場館既設計基本上沿用二千年前鬥獸場既設計

作者:Zannanza(本文章由聚言時報授權提供)


 超級工程:羅馬是怎樣建成的V軍人王朝(2) 之羅馬鬥獸場/下(Zannanza)

 https://www.facebook.com/GaldenPolymer/timeline