大家好!!! 首次晌呢個平台跟各位見面,若果您係足球迷可能會認識我,因我晌有線電視嘅足球頻道做主持已多年,而我嘅足球心水也一向也非常「準」。唔認識我亦唔緊要,正所謂一次生, 兩次熟,三次大結局!

眨眼間已由少女時期初入公仔箱呢行,到變為中女且作為準人母,時間不留人,女人不保養的話,青春也不留人,所以開始進入中女階段,一定要內、外補養,把年齡「急凍」啊!

今年年初懷孕,不經不覺懷孕已將近三十週,第一次做媽媽難免顯得有點荒失失,面對懷孕而產生的生理及心理變化如體重急升、尿頻、乳房漲大(這個我不介意)、肚皮漲大、情緒波動等等… 開頭確有點難適應,但過下又一日過下又一日,距離愛兒出世日子已不遠。

懷孕初期,身邊有懷孕經驗的絲打們多番提點我一定要塗「肚紋膏」,佢地話每日要塗好幾次絕不能懶,否則肚紋出現後做咩都難救。雖然亦有朋友會主張肚紋膏對抑制肚紋無關係,不過原本一塊平平嘅肚皮,被擴張到成個氣球咁大,對肌膚無疑都係一種負擔,對肚皮多點呵護都應該嘅,可幸暫時仍未有肚紋,今次就跟大家分享幾款我用過的肚紋膏。


圖:"肚紋很令人苦惱啊…"

1.泰國Lemongrass House的天然有機去妊娠紋膏
晌尖沙咀加連威老道買左呢一罐肚紋膏,這品牌以研製香薰精油起家,產品強調全天然手製。呢款肚紋膏含有洋甘菊、荷荷芭精油、牛油果油、維他命E、蘆薈等多種皮膚營養成分,保濕能力不錯,不過塗嘅份量要剛剛好,塗太多會有點「笠黐黐」嘅感覺,而且香味頗濃,不過買一罐應該夠用成個懷孕期,好抵用!

2.法國Mustela嘅產前防紋膏
一個生完B無耐嘅姊妹畀左呢支sample我試,仲要畀左好多支,諗住好用嘅話就去屈記買返支大既,但真係用極都用唔哂,相信用到我生都未用得完所有sample。呢一隻肚紋膏效果我最滿意,塗上肚皮後慢慢按下按下就吸收哂,而且潤澤既感覺頗持久,亦都唔算好「笠」,香氣亦討好。呢支防紋膏嘅專利成份聲稱能促進製造支撐皮膚嘅纖維,有效抵抗妊娠紋,亦含槐樹、乳木果及牛油果縮氨酸等等,成份天然,售價都唔會太貴,如果我唔係有咁多sample既話,都會買支大嘅黎用。
另外我仲有呢隻牌子既乳頭膏,但呢部分遲點再分享。

3.泰國Bath and Bloom嘅Virgin Coconut Body Lotion
朋友晌泰國買畀我用,雖然呢隻Body Lotion唔係針對肚紋,但係所蘊含既初搾椰子油對皮膚係好有益處,有效強化皮膚細胞,加強皮膚抵抗力,所以都可以用晌肚,而且芳香嘅椰子味非常吸引,我通常會用黎塗勻全身。我身邊有朋友非常愛好椰子油,沖涼、煮食、護膚都用椰子油產品架。



 https://www.facebook.com/wendyjackson1113?fref=ts