唔聽唔知係抄歌，華星三寶「抄歌史」

不經不覺 「華星三寶」已經成為九十年代尾及二千年代初的流行印記，八十年代是張國榮譚詠麟，九十年代頭是四大天王，然後就是 「華星三寶」及陳慧琳的那個年代。現在網絡個個懷愐「華星三寶」，其實佢地果時合唱時紅鬼咩，未只係紅起小眾上，當年華星三寶合唱時你未可能仲係聽緊梁詠琪或陳慧琳甚至係黎明，唔好扮哂野係都要爭相去加入呢個懷愐潮喎。不過，音樂而言，「華星三寶」只會讓我記起那個年代華星如何用90年代初的獨立音樂人做音樂班底，多得Evi Yang，將陳奕迅及楊千嬅及中期的梁漢文定位為indie 歌手的方向，不影studio 相，走粗糙print 路線，寶麗萊即影即有相，很個人化的歌詞題材，日本風的打扮，喂，你估好似而家咁乜野都標個「文青」，戴副眼鏡唱acousitc 音樂用哂d vanilla 粉彩色就係獨立音樂就係好野咩。

不過咁，其實 「華星三寶」的「經典」《大激想》，其實未又係一首大抄歌，只係好似冇乜有人提過，都幾奇怪，Brit Pop 樂隊Supergrass 當年都紅，但可能首張大碟【I Should Coco】較少人聽，連《大激想》抄碟中第一首歌《I’d Like To Know》出哂面都冇人講，其實都係奇。不過咁，《大激想》都出左咁耐，編曲的杜自持都冇再在香港樂壇活躍，鞭屍都冇用（或者係作曲林慕德主意，都冇乜好估）。

反而，有趣o既係，華星三寶另一首，亦係唯一一首《大激想》以外的作品《不一樣的夏》亦聽得出係有參考或者係受另一作品啟發，不過呢個由梁基爵編的case 就有趣得多。每次聽《不一樣的夏》就讓我自動醒起The Smiths 的《Ask》，當中的分段處理及整首作品的氣氛，就好似係由《Ask》裏頭細胞分裂出來，奇妙到連個MV都有波波的片段。又冇乜奇怪，The Smiths 係indie music 的先峰樂隊，而黃耀明本身就係Morrissey的樂迷，solo 作品無論音樂部份及演唱都有Morrissey的駐腳，咁梁基爵會靜靜雞將《Ask》拆骨再變成一首港式夏日作品，又有什麼出奇？

唔聽唔知係抄歌，唔少香港音樂人抄歌都真係無數（我仍然都要講，王雙駿《我的世界末日》的抄法係真正令人對香港樂壇感到蒙羞）。但都係果句，若要人不知，就唔好咁白癡。抄左，就預左畀人知，除非你真係可以坐時光機去undo 你抄歌的罪行啦。

作者：Damon