本來依個世界嘅國家都有供會,例如係 IMF、世界銀行或者亞洲開發銀行等,依啲就係國家同國家之間供嘅會(分別係依啲會息口比較低),如果成員國唔掂或者要發展都就去標會攞錢洗,但係依啲會都係由美國主導,係 IMF 美國甚至有否決權,亞洲開發銀行就以美日主導。

今次大陸攪亞投行就係自己係亞洲攪個會嚟供,擺明同美國對抗,以前有國家攪過類似野但係攪唔成,不過今次最神奇係英國佬玩埋一份,有大國支持係咪會攪得成呢?做咩英國佬會參加呢?做咩今次唔驚美國佬呢?

時間巧合

再有國家想攪壇野抗衡美國金融霸權本來就唔奇,不過大陸係依個時候攪就幾弔詭,大陸依家面臨緊經濟放緩,之前已經講過有以下現象:

– 14年GDP增長7.4%創24年來新低 – 外資頻將工序撤離大陸 – 減息

同時大陸需要經濟轉型到高增值行業,前文都提過低增值嘅代工業(無自家研發/品牌果種)仲係養住好多人,同時仲係大陸經濟支柱。近年因為人仔升值、勞工保障令人工大增等因素,外資已經由兩年前開始將代工廠搬去更內陸地區或者其他更平國家甚至搬回本國(詳見大陸會唔會經濟爆破?)

大陸唔可以再做世界工廠,不過轉型仲有好大困難,要谷經濟就靠基建投資。

亞投行正正就係攪基建供會,但係到依家都未講個會係點標/供,之前傳聞話大陸放棄否決權唔會好似美國係 IMF 咁打橫行,不過後來官方都澄清話無放棄否決權,大陸最後係咪會攞到主導權呢?定係其他國家都係度篤手指話加入先到時見到唔對路就唔俾錢呢?

睇返大陸依家嘅借貸情況,佢其實係向亞洲開發銀行借最多錢嘅國家(詳見中國也是跟亞洲開發銀行借最多錢的國家),佔總借貸大約4分一,一個咁缺錢嘅國家叫你一齊供會如果仲攞埋主導權咁會點呢?

香港參與有咩好處?

講返香港,香港參加有咩著數呢?香港有咩大型基建要標會?機場三跑(已經好大爭議)?高鐡(又延期又超資)?港珠澳大橋(依家分分鐘駁唔埋條橋)?香港係咪需要依啲「基建」呢?

定係香港借錢俾人收息?通常依啲會都係低息貸款,做咩唔攞啲錢買債券?陳家強話咩發展潛力大,咪玩喇。

至於香港以咩形式加入都未知,無外交權係咪仲有聲出都未知咁就話加入,要供幾錢又無講,係咪傳聞頭100億呢?係咪其他國家未確定俾錢果陣就叫我地俾住先呢?到時係咪問庫房攞呢?

之前曾俊華話香港可以做中介者或者支援等專業服務,咁做中介者或者支援點解要入亞投先做得呢?做菲傭中介果個都唔洗做菲傭喇,大陸其實係好大機會要搵香港做依啲專業服務,因為香港有深厚金融基礎同國際化人才,依啲野都係大陸缺乏嘅,到時真係佢急我唔急喎。

咁早加入真係唔知為乜,見唔到有咩先機要著喎,依家除咗睇到有人以表忠心都諗唔到對香港有咩好處。

 

作者:陳假(本文章由聚言時報授權提供)


 亞投行的疑點(陳假)

 https://www.facebook.com/GaldenPolymer/timeline