大陸經濟就爆破？

近來就算唔留意開財經新聞嘅朋友都唔難喺網上見到大陸經濟出現問題嘅消息，內容大致係： – 2014年GDP增長7.4%創24年來新低 – 大陸銀行降準備金 – 外資頻將工序撤離大陸 – 過剩產能和無效投資 – 官媒報導通縮將至 – 減息

好多人開始討論甚至期待大陸經濟爆破，究竟大陸經濟係咪會爆破呢？

上述現象的確係依家大陸經濟遇到嘅問題，亦係形成泡沫因素，概括可以咁講，大陸經濟增長已開始放緩，而大陸講咗轉營高增值工業好耐，不過進展唔多好，低增值嘅代工業(無自家研發/品牌果種)仲係養住好多人同時仲係大陸經濟支柱。近年因為人仔升值、勞工保障令人工大增等因素，外資已經由兩年前開始將代工廠搬去更內陸地方或者其他更平國家甚至搬回本國。大陸為保經濟增長最後都係出到減息，減息會令人仔減值同減低借錢成本，咁就可以吸引外資留返喺度同刺激出口，但係同時亦因為借錢易咗，過剩產能同無效投資都可以繼續借錢渡日維持落去，相反大陸唔繼續刺激經濟反而有機會俾佢迫走過剩產能同無效投資，但係大陸始終都堅持經濟增長等於維穩嘅信條。

無錯依啲因素的確會為大陸經濟構成危險，但係危險係咪已經到咗爆煲程度呢？一個經濟爆破通常都會出現股災（雖然實體經濟同股市有時差，仲有係香港經濟爆破唔代表樓市爆破，香港就黎層樓冧咗樓價都唔冧 ），尤其係睇大陸經濟有無爆到股市會更加有參考價值，因為大陸嘅經濟數據唔知有幾多係水分。

(利申：本人係相反理論信徒) 咁究竟點去睇一個股市到爆煲未呢？ 股災每次成因都唔同，不過由以往經驗可以總結到一啲共同現象，股市爆破前都會出現過熱現象，時辰到前咩股都會非理性喪升一段時間同好大幅度，到時股市同經濟因素大大脫節，周街嘅人講緊股票，連掃地阿姐都變成財經專家甚至股神喺度講埋一份教人買咩冧巴，大部分人覺得股票有升無跌， 啲人會用「今次唔同」 (This time is different) 嚟合理化喪升現象。

例如喺科網熱好多科網股升到 5-60倍市盈率，雖然只用市盈率估值係唔掂，但係隻隻都 5-60倍市盈率就一定好有問題，不過當時啲人就係話「今次唔同嘅」，「新經濟」點可以用舊方法衡量，結果就出現「眼球」(某網站有幾多少人進入觀看)計算方式嚟解釋升到離晒地嘅股票。其實08年金融海嘯前情況都係差唔多，07年股市已經不斷創新高，有人質疑股市會爆，不過又係有人話「今次唔同嘅」， 我哋有「阿爺」照，「直通車」開緊落嚟呀嘛，結果又因為「直通車」攪到恒指兩個幾月內爆升超過10000點，「直通車」咪即係依家個「滬港通」囉，咁依家個「滬港通」幫到香港啲咩呀？係喇，你「阿爺」就幫你喇，咁都攞黎炒根本就係啲人炒到上腦。

睇返大陸個市，大陸股市歷史雖然唔長，不過都出現過幾次殺傷力大嘅股災，而每次股災前都離唔開瘋狂大升市（當然大升同大跌中間都有上／落調整先令人難估到頂／到底），以下簡單描述一下大陸股災前後瘋狂上落程度，無興趣嘅可以略過（以下講緊上證指數，升跌幅度為約數）：

07年股災（金融海嘯） 前期喪升：2005年6月 1000點升到 2007年10月， 最高5818點，兩年升 480%

後期暴跌：2007年10月由最高點5818跌到 2008年11月低點1747，跌幅233％

當時差啲就打回05年原形，我諗應該都仲有人記得當年海嘯恆指跌到落10000點果陣有人預言10日內股市會到底，因為每日跌1000點10日後就係0

01年股災 前期喪升：1999年"519″出現股市井噴，由1050點開始，個半月內升近70%，1999年6月30日至1756點，2001年6月14日更升至2245點嘅歷史高位，即兩年內升約110%

後期暴跌：2001年6月由最高點2245跌至低點1346，跌幅40％，大家唔好以為升70%之後跌返40%係無咩問題，睇下1346點同原本1050點只係差30%，大家要小心依個數學問題

92年股災 前期喪升：1992年底由400點開始升至 1993年2月15日1536.82點，3個月就升咗280%

後期暴跌：1993年2月開始至1996年2月為大陸最長同最大跌幅熊市，由1993年2月最高點1558跌到1994年7月最低跌333，最大跌幅為78％

講返依家，大陸上證指數之前因為憧憬滬港通由 14年10月27日 2290點開始升到 15年 1月16日 3376點就發生 119 慘劇 1日跌7%，直到今日個市都係依個範圍上上落落，叫做半年內上升40%，以歷史作參考(只作參考，唔好每個數咬實去計)，比起之前股災前最少都喪升110%仲有段距離。

再睇股民反應，大陸股市都係以大陸本地人為主，依家大陸股民唔見有亢奮反應，都唔覺周街嘅人都講股票，同股災前盛況唔係似，所以個人認為仲未見到出現經濟爆煲先兆（會唔會有其他方面爆破就唔係本文討論範圍），而大家亦不宜養成等人死嘅心態，就算俾你有日等到大陸經濟爆破咁係咪代表會導致佢維穩失敗，處處動亂而引致共產政權倒台呢？香港人都係下定決心靠自己穩陣。

不過大家又唔好咁失望，睇大陸依家做嘅動作都似乎自己都確認咗經濟放緩，仲會用人仔減值刺激出口，就算人仔唔跌都唔會點升呀，即係話今年物價少咗個升嘅主因，不過香港無敵嘅租金就唔知會點喇。

題外話： 見到班外資開始撤離大陸其實又令我諗起以前香港班廠佬，香港工業死晒就係因為佢地只係識搵快錢，好景有錢果陣唔研發自己品牌/產品，「聽日賺唔賺到錢？」更加成為世界名句，結果低技術工業好易就被其他發展中國家取代(大部分係大陸)，完全無主導權，睇下其他國家有自家產品牌好似Panasonic、Uniqlo、Nike 咁，因為佢地有高技術/品牌等門檻，人地要取代你就無咁易，佢地搵其他國家都係做代工，最搵錢嘅收入都係流返去自己度，香港人嘅短視絕對前車可鑑。

作者

陳假